Tabata diahuebs ultimo cu Ministernan Mike Eman, Benny Sievinger y Otmar Oduber ta haya un yamada sumamente importante. Un conductor di tram ta confirma cu e prome turista a baha for di e tram na fin di caya.
Cu urgencia e ministernan tur bacha a sali core na careda pa bay Plaza Nicky Habibe pa duna e turista un caluroso bon bini. Minister Eman a keda un poco atras paso e mester a duna sunchi y duna brasa na tur hende cu e la topa na caminda pa Plaza Nicky Habibe.
“Esaki ta algo nunca visto” e conductor ta comenta. “Mi tin 3 aña ta core e tram aki y porfin mi a presencia e momento aki cu mi mesun wowonan. Esaki sigur ta mustra cu tur e miyones y miyones cu a wordo inverti den proyecto di caya grandi ta duna su fruta.”
E turista tur spanta a comenta cu e tabata full un sorpresa pe. E kermen e la haya un susto di su bida ora confetti a bay halto y brassband a cumsa toca, pero e ta sumamente contento cu e la tuma e decision di move su pianan enbez di sinta warda pa 15 minuut largo pa e tram core bek.
Minister Eman tur contento a brasa e turista masha duro mes y duna un bunita speech. Despues di kita awa for di wowo, Minister Eman y Minister Oduber a cana bay bestuurskantoor man teni.
HOPI BON. Laga nos warda 3 anja mas pa celebra e di dos turista…
Waw!!!!!!!! Hahahahah